მეთანის პროპორცია, რომელსაც ადამიანები გამოყოფენ ატმოსფეროში, იზრდება და ეს აჩქარებს კლიმატის ცვლილებას.
ახალმა კვლევამ აჩვენა, რომ 2000 წელთან შედარებით მეთანის რაოდენობა ჰაერში 12%-ით არის გაზრდილი. კიდევ უფრო მნიშვნელოვანი აღმოჩენა იყო, თუ საიდან არის მეთანის წყარო: ადამიანის საქმიანობიდან გამონაბოლქვი 20 წლის განმავლობაში გაიზარდა თითქმის 18%-ით, ხოლო ბუნებრივი გამონაბოლქვი, ძირითადად ჭაობებიდან, მხოლოდ 2%-ით.
„მეთანი არის კლიმატის საფრთხე, რომელსაც მსოფლიო უგულებელყოფს. მეთანის დონე უფრო და უფრო სწრაფად გაიზარდა, ვიდრე ნახშირორჟანგის”, – თქვა წამყვანმა ავტორმა.
ჯექსონმა აღნიშნა, რომ მეთანის მატების ეს ტენდენცია მსოფლიოს 3 გრადუს ცელსიუსამდე დათბობის გზაზე აყენებს, რაც ორჯერ აღემატება 2015 წლის პარიზის კლიმატის შეთანხმების მიზანს.
გეოგრაფიულად, ადამიანის მიერ გამოწვეული მეთანის ემისია იზრდება ყველგან, ევროპის გარდა, დიდი ნახტომებით აზიაში, განსაკუთრებით ჩინეთსა და ინდოეთში.
კვლევის მიხედვით, ბოლო 20 წლის განმავლობაში, ნახშირის, ნავთობისა და გაზის მოპოვებიდან მეთანის ემისია გაიზარდა 33%-ით, ნაგავსაყრელებიდან და ნარჩენებიდან 20%-ით, ხოლო სოფლის მეურნეობის ემისიები 14%-ით. ადამიანებთან დაკავშირებული ემისიების ყველაზე დიდი წყარო ძროხებია, თქვა ჯექსონმა.
მასალის გამოყენების პირობები
