რეპროდუქტოლოგი, გინეკოლოგი მანანა მგალობლიშვილი სოციალურ პლატფორმა „ტიკ-ტოკზე“ აქვეყნებს ვიდეომიმართვას, რომელშიც სწორი კვების ფორმულას გვიზიარებს. როგორც რეპროდუქტოლოგი აღნიშნავს, თუ ამ სქემის მიხედვით იკვებებით, ჭარბი წონის შემთხვევაში, წონის დაკლება გარანტირებული გაქვთ, ხოლო თუ ნორმალური წონა გაქვთ, მას შეინარჩუნებთ.
„დღეში უნდა იკვებოთ 4-ჯერ. კვებებს შორის ინტერვალი უნდა იყოს 3-4 საათი.
ვთქვათ, ისაუზმეთ, გავიდა 3-4 საათი, წახემსების დრო დადგა, მაგრამ არ გშიათ, ამ შემთხვევაში, მაინც უნდა იკვებოთ.
პირველი კვება არის ის, რაც გსურს, იმიტომ, რომ ადამიანს არ შეიძლება ზედმეტი სტრესი მიაყენო და არ შეიძლება ჩარჩოებში მოაქციო, ამიტომ, პირველი კვება მიირთვით რაც გსურთ, რაც გესიამოვნებათ და რაც გიყვართ.
წახემსება არის ყველაზე კარგი დრო იმისთვის, რომ მიირთვათ ხილი. ხილთან ერთად შეგიძლიათ მიირთვათ ხაჭო, მაწონი, კეფირი, თხილი, ცოტა შოკოლადი, ან ყავა.
წახემსებიდან 3-4 საათის გასვლის შემდეგ უკვე დგება სადილის დრო, რაც ძალიან მნიშვნელოვანია – რომც არ გშიოდეთ, მაინც უნდა ჭამოთ. მნიშვნელოვანია, რომ სადილი იყოს გემრიელი და ისეთი, როგორიც თქვენ მოგეწონებათ.
სადილი უნდა შედგებოდეს სამი ძირითადი კომპონენტისგან: ნახევარი თეფში უნდა იყოს ბოსტნეული, რაც თქვენ გნებავთ: პომიდორი, კიტრი, ბულგარული წიწაკა, მწვანილები, სალათის ფურცლები – რაც მოგესურვებათ, ეს შესაძლოა იყოს შეზავებული ზეთით, ძმრით, სოიოს სოუსით, მარილით, წიწაკით და ა.შ.
თეფშის ერთი მეოთხედი უნდა იყოს ცილა: ნებისმიერი ხორცეული ან კვერცხი.
თეფშის შემდეგი ერთი მეოთხედი უნდა იყოს ნახშირწყლები – ეს შეიძლება იყოს პური, წიწიბურა, ბრინჯი, კარტოფილი.
მეოთხე კვება ეს არის ერთი ჭიქა კეფირი, მას შეგიძლიათ შეურიოთ რამდენიმე კოვზი ჩია, მაგრამ ეს უნდა მოამზადოთ 2-3 საათით ადრე, რომ საღამოს მზად იყოს.
ძალიან მნიშვნელოვანია, ეს კვებები, დღის განმავლობაში, დროის თვალსაზრისით სწორად იყოს გადანაწილებული. დღის ბოლო კვება, მაქსიმუმ, 20:00 საათზე უნდა იყოს.
კვებებს შორის არ უნდა მიირთვათ არაფერი წყლის გარდა, ასევე შეგიძლიათ უშაქრო ყავა და ჩაი, თუმცა არანაირი სასუსნავი. დამერწმუნეთ, თუ გაქვთ ჭარბი წონა და ამ ფორმულის მიხედვით იმოქმედებთ, აუცილებლად დაიკლებთ და წონის კლებას სულ რაღაც 4-5 დღეში იგრძნობთ“, – აღნიშნავს რეპროდუქტოლოგი მანანა მგალობლიშვილი.
მასალის გამოყენების პირობები
