უცხოელი სტუდენტების ჩარიცხვის წესები საქართველოს უნივერსიტეტებში — ახალი დადგენილება

პრემიერ-მინისტრ ირაკლი კობახიძის მიერ ხელმოწერილი დადგენილების თანახმად, უცხო ქვეყნის მოქალაქეებს და მოქალაქეობის არმქონე პირებს საქართველოს უნივერსიტეტებში სწავლა ერთიანი ეროვნული გამოცდებისა და საერთო სამაგისტრო გამოცდების ჩაბარების გარეშე შეეძლებათ კონკრეტული პირობების დაკმაყოფილების შემთხვევაში.

ეროვნული გამოცდების გავლის გარეშე ბაკალავრიატში სწავლის უფლება ექნებათ იმ უცხოელებს, რომლებმაც სრული ზოგადი განათლება მიიღეს უცხო ქვეყანაში, ან საქართველოში — საქართველოს მიერ აღიარებული უცხო ქვეყნის ან საერთაშორისო პროგრამების ფარგლებში (გარდა იმ პირებისა, რომლებიც ერთდროულად საქართველოს მოქალაქეებიც არიან). ასევე, ამ კატეგორიაში ხვდებიან ის უცხოელები, რომლებმაც კრედიტები ან კვალიფიკაცია უცხო ქვეყნის კანონმდებლობით აღიარებულ უმაღლეს დაწესებულებაში მიიღეს.

სამაგისტრო საფეხურზე საერთო გამოცდების გარეშე ჩარიცხვა შეეძლებათ: უცხოეთში შესაბამისი აკადემიური ხარისხის მქონე პირებს; უცხო ქვეყნის მოქალაქეებს, რომლებსაც უცხოეთის უნივერსიტეტის მაგისტრატურაში კრედიტები დაგროვებული აქვთ; ასევე იმ პირებს, რომლებმაც ბაკალავრიატში ამავე დადგენილებით გათვალისწინებული წესით ჩაირიცხნენ.

მნიშვნელოვანი სიახლეა ენის ცოდნასთან დაკავშირებული მოთხოვნა: 2027-2028 სასწავლო წლიდან, უცხო ქვეყნის მოქალაქე ვალდებული იქნება, საგანმანათლებლო პროგრამის სწავლების ენა სერტიფიკატით დაადასტუროს ან შეფასებისა და გამოცდების ეროვნული ცენტრის მიერ ორგანიზებული გამოცდა ჩააბაროს. ქართულენოვანი პროგრამის შემთხვევაში დამატებით სახელმწიფო ენის გამოცდა იქნება საჭირო. ბაკალავრიატის საფეხურზე სავალდებულოა ენის B1 დონე, სამაგისტრო პროგრამებზე კი — B2.

- Advertisement -

სწავლის უფლების მოსაპოვებლად განცხადება განათლების ხარისხის განვითარების ეროვნულ ცენტრს უნდა წარედგინოს — შეიძლება ამის გაკეთება როგორც აპლიკანტმა, ასევე მიმღებმა უნივერსიტეტმა. დადებითი გადაწყვეტილების შემთხვევაში ჩარიცხვა მოხდება განსაზღვრულ პერიოდებში: 1 თებერვლიდან 15 მარტამდე ან 15 აგვისტოდან 31 ოქტომბრამდე.

დადგენილება ასევე ადგენს სტუდენტის სტატუსის შეჩერებისა და შეწყვეტის საფუძვლებს. თუ სტუდენტი ერთი სასწავლო წლის განმავლობაში წლის მაქსიმალური კრედიტების ერთ მესამედზე მეტს ვერ დააგროვებს, უნივერსიტეტი ვალდებულია მისი სტატუსი შეაჩეროს. სტატუსის შეჩერებიდან 90 დღის გასვლის შემდეგ, ან სწავლის შეწყვეტის შემთხვევაში, D6 კატეგორიის სავიზო ან საცხოვრებელი ნებართვის მქონე პირს შეიძლება საქართველოში ყოფნის ვადა შეუწყდეს.

წყარო: · მოამზადა SheniGanatleba.ge-მ

იხილეთ ასევე: SheniEkimi.ge · SheniAmbebi.ge · განათლების რუკა