ცნობილი ამერიკელი ყაჩაღის, ბილი კიდის ერთადერთი ფეროტიპული ფოტო აუქციონზე 2.3 მლნ დოლარად გაიყიდა. ფოტო კერძო კოლექციონერმა დენვერის ყოველწლიურ აუქციონზე შეიძინა.
ორგანიზატორები ლოტს 300-400 ათას დოლარად აფასებდნენ. ცნობილი ფოტო 1879-1880 წლებში ფორტ სამერში, ნიუ-მექსიკოშია გადაღებული. ფოტოზე ამერიკელი ყაჩაღი კარაბინით ხელში პოზირებს, მარცხენა ხელთან “კოლტის” რევოლვერი ჩანს.
ამ ფოტოზე დაყრდნობით, ბილი კიდზე გადაღებული ვესტერნის “ცაცია-მსროლელის” (The Left Handed Gun) ავტორებმა (ფილმში მთავარ როლს პოლ ნიუმენი თამაშობს) შეცდომით ივარაუდეს, რომ ბილი კიდი ცაცია იყო. ცნობილია, რომ ფეროტიპულ ფოტოებზე გამოსახულება სარკისებურად შებრუნებულია.
ბილი კიდი მე-19 საუკუნის დასასრულს ცხოვრობდა. ლეგენდის თანახმად, კიდი 21 წლის ასაკში გარდაიცვალა. სიცოცხლის მანძილზე მან 21 ადამიანი მოკლა.
მომზადებულია AP Associated Press-ის მიხედვით.
მასალის გამოყენების პირობები
