როდესაც საქმე დეტექტივებს ეხება, ფილმისგან ძლიერი შთაბეჭდილების დატოვების მთელი პასუხისმგებლობა კულმინაციურ ფინალს ეკისრება. ხარისხიანი ნამუშევარი გულწრფელი გაოცების გემოსა და მოულოდნელობის ისეთ ეფექტს ტოვებს, რომლისგანაც თავის დაღწევა ეკრანზე ტიტრების გასვლის დროსაც კი შეუძლებელია. მოულოდნელი სიუჟეტური შემობრუნება ლოდინად უნდა ღირდეს, თუმცა მაყურებლისთვის განსაკუთრებით სასიამოვნოა, როდესაც რეჟისორი და სცენარისტი მას თითქოს ხელს უწყობენ, მის პირად ვარაუდებს ამართლებენ და დანაშაულის გამოძიების უნარებში რწმენას უმტკიცებენ. ჩვენს სიაში შესულია 7 უდიდესი ფილმი, რომლებმაც დეტექტივის ჟანრში თამაშის წესები შეცვალეს.
1. “ფანჯარა ეზოს მხარეს” (1954)
ალფრედ ჰიჩკოკის ოსტატობის მწვერვალად ხშირად ტრილერს “ფანჯარა ეზოს მხარეს” ასახელებენ. ფილმმა არა მხოლოდ მოახდინა გავლენა ამ ჟანრის მომდევნო სურათებზე, არამედ მაყურებელს თავი დაამახსოვრა, როგორც ერთდროულად მომხიბვლელმა ისტორიამ იმის შესახებ, თუ რა ხდება ადამიანის ცხოვრებაში დახურულ კარს მიღმა.
მთავარი გმირი, პროფესიონალი ფოტოგრაფი ჯეფერისი, მოტეხილი ფეხის გამო სავარძელსაა მიჯაჭვული, რის გამოც ფილმის თითქმის მთელი მოქმედება მისი ბინის გარემოცვაში ვითარდება. ეს კი მომხრჩობელი შიშის განცდას ბადებს. თავის შესაქცევად ჯეფი მოპირდაპირე სახლის მეზობლებზე დაკვირვებას იწყებს. მოულოდნელად იგი აღმოაჩენს, რომ მის მეზობელ ლარს თორვალდს, შესაძლოა, საკუთარი ცოლი მოეკლა. დანაშაულში გასარკვევად იგი დასახმარებლად თავის მეგობარ ქალს, მაღალი საზოგადოების წარმომადგენელ ლიზას უხმობს. თქვენ საკუთარ ვარაუდებში ეჭვის შეტანა და მინიშნებებზე რამდენჯერმე დაფიქრება მოგიწევთ, რადგან ყველა მათგანი ისეთივე ორსახოვანია, როგორც თავად ადამიანის ბუნება. კულმინაციად სიუჟეტის სრულიად მოულოდნელი შემობრუნება იქცევა, ფილმის შემდგომი განცდა კი ბინაში ფარდების ჩამოფარებას – თუნდაც უახლოეს მომავალში აუცილებლად გაიძულებთ (ასევე დაგაინტერესებთ: 8 ფილმი, რომლებიც კადრსმიღმა არსებული სკანდალებით, შემოქმედებითი უთანხმოებით, სასამართლო დავებითა და სასიყვარულო ურთიერთობებით მედიის ყურადღების ცენტრში მოექცა)
2. “შვიდი” (1995)
გამოცდილი დეტექტივი უილიამ სომერსეტი პენსიაზე მალე გასვლასა და კრიმინალისა და გამოძიებებისგან რაც შეიძლება შორს ყოფნაზე ოცნებობს. თუმცა, მუშაობის ბოლო კვირას მას ახალგაზრდა და ამბიციურ მეწყვილეს, მილსს მიუჩენენ. ქალაქში განსაკუთრებული სასტიკობით ჩადენილი მკვლელობა ხდება, რომელიც შვიდი მომაკვდინებელი ცოდვის პრინციპზე დაფუძნებული საშინელი დანაშაულების მანკიერ ჯაჭვს უდებს სათავეს.
“შვიდი” 90-იანი წლების კრიმინალური ტრილერის ეტალონს წარმოადგენს. ფინჩერის აბსოლუტურად გენიალური და შეუდარებელი ნამუშევარი მაყურებელს აღაფრთოვანებს და როგორც ამბობენ, დამშვიდება ფილმის დასრულების შემდეგაც გაგიჭირდებათ. საიდუმლო იმაზე კი არ არის აგებული, თუ კონკრეტულად ვინ სჩადის დანაშაულს, არამედ იმაზე, თუ რა მეთოდით აკეთებს ამას იგი…
3. “მემენტო” (2000)
კრისტოფერ ნოლანის კარიერაში საკვანძო სურათად სწორედ “მემენტო” იქცა, რის შემდეგაც მას თანამედროვეობის უდიდეს რეჟისორად მიირჩნევენ. რეჟისორის ძმის, ჯონათან ნოლანის მოთხრობის მიხედვით გადაღებული ფილმი ანტეროგრადული ამნეზიით დაავადებული ლეონარდ შელბის ბედზე მოგვითხრობს. ავადმყოფობის გამო გმირს არაფერი ახსოვს, თუმცა ცოლის მკვლელის პოვნის სურვილი, რომლის გამოც მას ეს ტრაგედია თავს გადახდა, იმდენად დიდია, რომ დანებება არ შეუძლია.
მის არსენალში მხოლოდ ფოტოები, ხელნაწერი შენიშვნები და ტატუებია. დეტექტივი რთულ ინტელექტუალურ სისტემას წარმოადგენს, რომელშიც მინიშნებებისთვის ხელის ჩავლება მაინც შესაძლებელია – თუმცა, მხოლოდ იმ შემთხვევაში, თუ ეკრანს თვალს ერთი წამითაც არ მოაცილებთ და მას ძალიან ყურადღებით უყურებთ.
4. “მოქალაქე კეინი” (1941)
“მოქალაქე კეინი” უნდა განვიხილოთ არა იმდენად დეტექტივად, რამდენადაც ცხოვრების აზრის მაძიებელი ადამიანის საიდუმლოების ეტალონად. ფილმის საფუძვლად უილიამ რენდოლფ ჰერსტის ცხოვრებაა აღებული. სწორედ იგი გახდა პროტოტიპი გამომცემლობის დაუზოგავი მაგნატის, ჩარლზ ფოსტერ კეინისა, რომლის უკანასკნელი სიტყვა “როუზბადი” რეპორტიორ ჯერი ტომპსონს ამავე ადამიანის ბედის საიდუმლოს ამოხსნას შთააგონებს.
5. “ჩრდილოეთისკენ ჩრდილო-დასავლეთიდან” (1959)
ალფრედ ჰიჩკოკის საუკეთესო ფილმის ტიტულისთვის ბრძოლაში თავდაჯერებულად ერთვება სურათი “ჩრდილოეთისკენ ჩრდილო-დასავლეთიდან”. დღემდე დეტექტიური ფილმების მხოლოდ მცირე ნაწილს თუ შეუძლია გაუწიოს მას კონკურენცია ინტრიგასა და ფინალის მოულოდნელობაში. სარეკლამო სააგენტოს ხელმძღვანელი, როჯერ თორნჰილი უცხოელ ჯაშუშებს შეცდომით საიდუმლო აგენტ ჯორჯ კაპლანად მიაჩნიათ, რის შემდეგაც მისი ცხოვრება თავბრუდამხვევ დევნად იქცევა. საკუთარი უდანაშაულობის დასამტკიცებლად მას მოულოდნელობებითა და ღალატით აღსავსე გრძელი გზის გავლა მოუწევს, რადგან გმირი მხოლოდ ასე შეძლებს იმის გაგებას, თუ რატომ დაატყდა ყველა ეს მოვლენა მაინცდამაინც მას თავს… სრულად
ასევე ნახეთ:
ქალი მასწავლებელი, რომელმაც მსოფლიო შეცვალა
მადამ კლიკო — ქალი, რომელმაც დღევანდელი შამპანური შექმნა
iPhone: https://apps.apple.com/fr/app/sheni/id6746877342?l=en-GB
Telegram არხი: https://t.me/SheniEkimi
