ფსიქოლოგი გიორგი ჩოგოვაძე 10 აპრილს სოციალურ ქსელში მასწავლებლებისა და მშობლებისთვის საყურადღებო მიმართვას აქვეყნებს და წერს, რა უნდა ისწავლონ ბავშვებმა:
“აუცილებლად ასწავლეთ ბავშვებს!
– ასწავლეთ ბავშვებს, რომ მზე ერთადერთია და არ იმარცვლება.
– ასწავლეთ, რომ არ არის აუცილებელი ყველას სიყვარული, მაგრამ აუცილებელია ყველას აზრის პატივისცემა.
– ასწავლეთ ბავშვებს, რომ შეცდომების დაშვება არ არის ტრაგედია….შეცდომების აღიარება სიძლიერეა.
– ასწავლეთ ისეთი ზღაპრების წერა, რომლის ბოლოც ყოველთვის კეთილი არ არის.
– ასწავლეთ, რომ თუ ეტირებათ, აუცილებლად იტირონ, რადგან ტირილი სირცხვილი არ არის.
– ასწავლეთ, რომ არც დამარცხებაა სირცხვილი…
– ასწავლეთ დაკვირვება, რათა ისეთი რაღაცები აღმოაჩინონ, რასაც სხვები ვერ ხედავენ.
– ასწავლეთ როგორ დახუჭონ თვალები ისე, რომ გაფრინდნენ და იმოგზაურონ მსოფლიოს სხვადასხვა კუთხეში.
– იმედის გულით ტარება ასწავლეთ, უკეთესი ხვალინდელი დღის იმედის.
– ბუნების სიყვარული და მასზე ზრუნვა ასწავლეთ.
– ადამიანების რწმენა და სიყვარული ასწავლეთ, მაგრამ არც იმის თქმა არ დაგავიწყდეთ, რომ ყველა ადამიანი კეთილი არ არის, ამიტომ ფრთხილად ყოფნაც ასწავლეთ.
– ასწავლეთ, რომ ადამიანის გულსა და გრძნობებს უნდა გაუფრთხილდნენ.
– ასწავლეთ, რომ არ უნდა მოატყუოს, არ უნდა ატკინოს გული და არ უნდა დაჰპირდეს იმას, რასაც ვერ შეასრულებს.
– ასწავლეთ, რომ როცა იტყვის “მიყვარს”, ამ სიტყვებსაც და იმ ადამიანსაც მთელი გულით უნდა უერთგულოს, რადგან სიყვარული თამაში არ არის…
სიმართლის თქმის სიმამაცე ასწავლეთ, მოთმინება ასწავლეთ, და მთავარი – მიმტევებლობა ასწავლეთ, რადგან პატიება ძლიერებს შეუძლიათ.
– ღიმილი ასწავლეთ, გაღიმების უნარი, ნამდვილი გაღიმების. მხოლოდ ტუჩებით კი არა, თვალებით, გულით გაღიმება ასწავლეთ.
– ბედნიერების განცდა ასწავლეთ, მადლიერება ასწავლეთ, საკუთარი თავის და სამყაროს მიმართ.
მიეცით ბავშვებს უპირობო სიყვარული.
და ყველაზე მთავარი, ნუ შეაშინებთ ბავშვებს ღმერთის სახელით. ღვთის შიშის ნაცვლად, ღვთის სიყვარული ასწავლეთ.
მიეცით ბავშვებს უფლება, იყვნენ თავისუფლები და ბედნიერები!”.
",iconSize:[14,14],iconAnchor:[7,7]});var marker=L.marker([p.lat,p.lng],{icon:mk}).addTo(m);marker.bindPopup(""+p.name+"");bounds.push([p.lat,p.lng]);});if(bounds.length===1){m.setView(bounds[0],11);}else{m.fitBounds(bounds,{padding:[40,40]});}});© OpenStreetMap · PHIG
