ახალი სასკოლო სახელმძღვანელოები: ვინ დაწერა და რა შეიცავს თითოეული წიგნი

განათლების სამინისტრომ მომზადებული სასკოლო სახელმძღვანელოების ელექტრონული ვერსიები საჯაროდ გამოაქვეყნა. ხელმისაწვდომია მოსწავლისა და მასწავლებლის წიგნები, ასევე სამუშაო რვეულები, თუმცა სრული ვერსიები ჯერ კიდევ არ არის ატვირთული. ახალი სახელმძღვანელოები მოიცავს შემდეგ საგნებს: საქართველოს ისტორია, ქართული ენა და ლიტერატურა, ქართული ენა, ქართული ლიტერატურა, ქიმია, ფიზიკა, ბიოლოგია, გეოგრაფია, მათემატიკა, მსოფლიოს ისტორია, სამხედრო საქმე და ბუნებისმეტყველება.

საქართველოს ისტორიის სახელმძღვანელო, რომელიც მეშვიდე და მეათე კლასებისთვისაა განკუთვნილი, შეიქმნა ჯაბა სამუშიას, გიორგი კალანდიას, ალექსანდრე ბოშიშვილისა და ლერი თავაძის ავტორობით. პირველი კლასის ქართული ენისა და ლიტერატურის წიგნი კი თამარ ჯაყელმა, თამარ მახარაძემ, ზურაბ ვახანიამ, ვერიკო სომხიშვილმა და ნანა ბურძენიძემ შეადგინეს.

ქართული ენის (გრამატიკის) სახელმძღვანელო მეშვიდე და მეცხრე კლასებისთვის ავთანდილ არაბულმა და დალი ბენაშვილმა მოამზადეს, ხოლო ამავე კლასების ქართული ლიტერატურის წიგნს ხელი მოაწია მაია ჯალიაშვილის, თინათინ ცერაძის, ფატი ფირუაშვილის, მაკა სახურიას, ლალი დათაშვილის, ივანე ამირხანაშვილის, ლელა ელისაშვილისა და ქეთევან რეხვიაშვილის ავტორთა ჯგუფმა.

ფიზიკის სახელმძღვანელო მეშვიდე და მეათე კლასებისთვის ცხრა ავტორის — ქეთევან ტატიშვილის, თემურ შენგელიას, ოთარ ღონღაძის, ზურაბ ბერიას, გიორგი ლომიძის, მერაბ ტუღუშის, თეიმურაზ შენგელიას, ოლეგ გაბრიაძისა და ნათელა ჩაჩავას — ერთობლივი ნაშრომია. მათემატიკის სახელმძღვანელო კი ყველაზე მასშტაბური ავტორთა ჯგუფის ნაყოფია — პირველი, მეხუთე, მეშვიდე და მეათე კლასებისთვის სულ თექვსმეტმა სპეციალისტმა იმუშავა.

- Advertisement -

მსოფლიო ისტორიის სახელმძღვანელო მეშვიდე კლასისთვის ჯაბა სამუშიამ, მაია ღამბაშიძემ და ემილ ავდალიანმა შეადგინეს. სამხედრო საქმის წიგნი მეცხრე კლასისთვის მომზადდა პოლკოვნიკების კახაბერ ჭაფოძისა და რევაზ ნიკოლეიშვილის, ასევე ქეთევან ოსეფაიშვილის, გვანცა მღვდელაძისა და გიორგი გერმისაშვილის მონაწილეობით. პირველი კლასის ბუნებისმეტყველების სახელმძღვანელო კი შექმნეს აივენგო შათირიშვილმა, თამარ ჯაყელმა, მარიამ წიკლაურმა და რუსუდან ახვლედიანმა.

წყარო: · მოამზადა SheniGanatleba.ge-მ

იხილეთ ასევე: SheniEkimi.ge · SheniAmbebi.ge · განათლების რუკა