ნათია უჩავა დაწყებითი საფეხურის მენტორი მასწავლებელია. ის უკვე 11 წელია, მასწავლებლად მუშაობს. ამჟამად თბილისის 126-ე საჯარო სკოლაში ასწავლის, მოსწავლეებთან ერთად არაერთ აქტივობას ახორციელებს, მათთვის საინტერესო და სახალისო რესურსებს ქმნის და ცდილობს, საგაკვეთილო პროცესი მოსწავლეებზე ორიენტირებული გახადოს. ნათია საკუთარი გამოცდილებისა და იმ სირთულეების შესახებ გვესაუბრება, რომლებსაც პროფესიაში აწყდება:
– ჩემს ცხოვრებაში ერთ-ერთი ყველაზე სწორი გადაწყვეტილება პროფესიის არჩევის დროს მივიღე. არ მახსენდება კონკრეტული მიზეზი, რამაც გადამაწყვეტინა ამ პროფესიის არჩევა… ალბათ, უფრო შინაგანი ხმა იყო, რომელსაც მოვუსმინე. ზოგჯერ, ვფიქრობ ხოლმე, რომ მასწავლებლობა გენეტიკურია, რადგან ბაბუაჩემიც მასწავლებელი იყო.
– როგორ ფიქრობთ, რა არის ყველაზე რთული დაწყებითი საფეხურის მასწავლებლობაში?
– დაწყებითი კლასის მასწავლებელს მოდუნებისა და დაღლის უფლება არ აქვს. მოთმინებითა და სიყვარულით უნდა იყოს სავსე, თუ უნდა, რომ შედეგზე გავიდეს. სამწუხაროდ, ბავშვებს სასკოლო მზაობა ხშირად არ აქვთ. გვიწევს დამატებით იმ საკითხებზე მუშაობა, რაც მოსწავლეს უნდა ჰქონდეს. ამაში კი საკმაოდ ბევრი დრო და ენერგია იხარჯება.
– რა უნარებსა და ცოდნას უნდა ფლობდეს დაწყებითი საფეხურის მასწავლებელი, რომ მოსწავლეების დაინტერესება შეძლოს?
– დაწყებითი კლასის მასწავლებელს სულ სხვა სპეციფიკა აქვს – როცა დაწყებით საფეხურზე შედიხარ, იდეებით და ფანტაზიებით სავსე უნდა იყო. ძალიან, ძალიან უნდა გიყვარდეს ბავშვები. სხვანაირად უბრალოდ ვერ იმუშავებ…
– თავად რა გეხმარებათ ყველაზე მეტად?
– არ მიყვარს ერთფეროვნება. შესაბამისად, სულ სიახლის ძიებაში ვარ. ჩემი საგაკვეთილო დღეები მრავალფეროვანია. არც იდეების ნაკლებობას ვუჩივი. სიამოვნებას მანიჭებს ის საქმე, რასაც ვაკეთებ. ეს განწყობა კი ძალიან მეხმარება.
– რამდენად მნიშვნელოვანია დამატებითი რესურსების მოძიება, მოსწავლისათვის გაზიარება – შედეგის თვალსაზრისით, ეფექტურია?
– მე ვიტყოდი, რომ აუცილებელია. მოსწავლეს მუდმივად უნდა შესთავაზო იმაზე მეტი, რაც სახელმძღვანელოში გხვდება. თავად ვქმნი მატერიალურ და ელექტრონულ რესურსებს, რომლებიც მოსწავლეებს ძალიან მოსწონთ. მოგეხსენებათ, დაწყებით კლასში თვალსაჩინოებებით სწავლებას დიდი ადგილი უჭირავს, შესაბამისად მასწავლებელმა უწყვეტ რეჟიმში უნდა შესთავაზოს მოსწავლეებს განსხვავებული რესურსები,რათა მათი ყურადღება არ მოდუნდეს. წაიკითხეთ სრულად
მასალის გამოყენების პირობები
